周星馳——大話西遊講功夫
文：JOSEPH & SAMMY 攝影：漢寶
(序)問星爺《少林足球》係唔係武打片?
「呢樣我唔同意喎! 極其量你都只可以話佢係一部動作片，裏面係有功夫呀，但係由頭到尾都冇人打過交呢，係都剩係打個波咋!」
問佢有關功夫的定義。
「咁功夫始終都係格鬥技，最講究應該係實用，但係實用得嚟又唔係叫你去打爛仔交果隻喎!」
問對本刊的期望。
「喂你地《新格鬥》應該灌輸多啲正面、健康嘅訊息俾人，應該強調多啲比賽嘅感覺，唔好講咁多有關街頭摶擊，即係打爛仔交。」
第一條：套片己經睇過，信息好明確，星爺你啱。
第二條：實用嘅功夫係咪等同爛仔交，呢樣嘅好難講，有排拗。
第三條：由頭到尾我哋冇叫人打街頭摶擊，放心星爺!
喂，咁即係打定唔打?
打「硬」! call機顯示兩個鐘頭後會打八號波。
都係由個波問起啦!
新(新格鬥) 周(周星馳)
新：點解會有開拍《少林足球》嘅構思?
周：基本上搞呢部《少林足球》係為咗想拍番一部集功夫片加動作片嘅新片種，其實即係用功夫嚟做題材，再加足球，你知而家咁heat係咪，就再加埋動作嘅元素，總之就係乜鬼都有果隻啦! 你知而家啲電影題材冇話限死一樣劵岅，明明係笑片，無端端有動作哦最後原來係講鬼嘅仲得! 可以好天馬行空。
新：之前的作品例如《食神》都有提及上少林學武情節，係唔係對少林情有獨鍾?
周：咁講到功夫呢家嘢，少林當然係冇得頂啦，所謂「天下武功出少林」吖嘛，再加上市場嘅考慮，同自己對於功夫嘅情意結，所以成日搵少林嚟搞就必然啦。
新：你話《少林足球》極其量係一部動作喜劇，日後會唔會拍一部純武打嘅周星馳電影?
周：(周生語氣堅定，雙眼綻放異彩)會，一定會 ! 其實不嬲都有諗住拍番部功夫片嘅，亦有諗過拍以少林寺為題材嘅片，不過你一講到話功夫片呢家嘢，我就梗係又李小龍啦! 其實我一直都想拍一部《李小龍傳》嘅，亦有傾過，不過傾唔成。外國果部? 嗯…唉! 果部，哈哈….(乾笑)坦白講，我就未睇過外國果套，不過我諗中國人嘅著眼點同拍法都應該有啲分別嘅。
新：如果拍，係咪你做番李小龍?
周：吓? 我頭髮都白啦，仲點做李小龍呀! (笑)不過如果真係要拍，首先要寫好個故事，然後全世界招募，揾一個最似李小龍嘅人去演。
講到功夫……
新：刦你拍《新精武門》時已經聽過導演盛讚你嘅功夫「出奇的好!」你有冇學過功夫?
周：我當年讀中學果時，就已經非常熱愛功夫，尤其是唔駛講都知梗係李小龍最勁啦，所以果時多數都會留喺屋企練，咪買埋啲書，好似咩「李小龍截拳道訓練法」呀咁，咁有陣時咪拉埋梁朝偉一齊練囉。唔係我打到佢就係佢打到我。到後來我就去黃淳樑度學咗幾個月詠春，果時有個師兄好犀利! 都唔記得叫乜名，佢有一下嘢好快，真係點都擋唔到，不過佢係得呢下咁快咋噃，嘩好野! 不過我冇繼續學，我鍾意去領略同了解啲拳理，然後自己研究。
新：為咗拍動作片，平時有冇特別操練方法?
周：跑步啦，主要都係跑步。唔跑邊夠氣呀? 嘩，去個球場度拍戲喎! 一NG咗又要由呢便跑番到果便再嚟過，唔好氣都幾難頂! 不過咁跑法已經係鍛練啦。
為咗拍《少林足球》，我一年前就開始做準備keep fit，我就比較鍾意去戶外操練，帶埋啲靶呀咁去練，因為李小龍都係咁。而且你話講開身形，李小龍真係最fit! 真係連一啲多餘嘅脂肪都冇。而且你睇吓，佢唔一舊二舊肌肉，係有線條劵，我敢話，廿一世紀健身界都將會以李小龍嘅體形嚟做標準!
新：除咗練功，平日有冇留意世界武壇?
周：有定啦，好似K-1，終極搏擊我都有睇嘅，無限制嘅打法真係好鬼刺激。不過佢哋唔係亂嚟嘅，都好講求技術，講到我欣賞邊個好手? Rickson Gracie啦，打法全面，技術好；而且我懷疑佢學過氣功，因為我睇過佢一套教動作嘅錄影帶，佢去個沙灘度用好特別同急促嘅腹式呼吸方法，佢唔簡單!
新：自己有冇練到得意技(絕招)?
周：(停了半晌)游水啦，我游蛙式好叻o架!
新：……
後記：同一日，星爺連續接受幾家週刊的訪問，縱然露疲畢態，仍敬業樂業。
同一日，新片首日公映卻遇上八號風球，不免戚然，但輕鬆自若。
「每當我失意，每當我低落嘅時侯，只要我一想起李小龍，想起佢不屈不撓同逆境戰鬥嘅精神，我就會冇事㗎啦。」
星爺，全世界等緊你部《李小龍傳》!