歐錦棠實驗電影趕煞科李小龍大師兄出山義助

一部由歐錦棠自資開拍，故事圍繞李小龍生平事迹的實驗電影《一九五九某日某》，近日正忙於趕拍煞科，而最令歐錦棠雀躍的，是他昨日竟然成功邀得李小龍的師傅葉問的大仔葉凖師傅出山，義務演出兼借出練武器具。

昨日歐錦棠在深水埗租借了一個行將拆卸的舊樓單位，拍攝他自資的實驗電影《一九五九某日某》，片中飾演李小龍師傅葉問一角的，赫然是葉問的大仔葉凖(李小龍師兄)，對於能邀得葉師傅助陣，阿棠開心得不得了。

老婆幫手做場務

阿棠對記者說：「我呢部電影，連老婆(萬斯敏)都出埋嚟幫手做場務，而且一班兄弟個個肯『拍膊頭』幫手，我已經好高興，而能夠請到葉準師傅客串一角，真係意想不到。」

「其實初時我都好頭痛，都唔知李小龍師傅葉問個角色由邊個做，咁啱有同事係葉準師傅嘅徒弟，於是搵佢幫手。佢肯義助之餘，重借咗一對八斬刀同練詠春嘅木人樁畀我拍戲，真係唔知點多謝佢老人家好。」

另外，現年七十三嵗但仍然精神奕奕的詠春大師葉準，他透露稍後將為王家衛一部電影做顧問，他說：「早排同澤東電影公司簽咗約，係王家衛做導演，佢哋想拍我爸爸葉問響五十年代至七十年代間香港嘅事迹，所以搵我做顧問，幾時開拍我都唔知嘅，不過啲顧問費我都是晒囉!」