李小龍師傅之子葉準 王家衛六萬元簽做顧問

師傅到!

歐錦棠執導將近埋尾的實驗電影「一九五九某日某」中的關鍵人物葉準，昨日終於出場。葉準師傅並非等閒人物，他是李小龍的師傅葉問之子，是次答應粉墨登場，扮演其先父葉問，純粹幫徒弟一把；因為他的一位徒兒與阿棠甚老友，所以愛徒一出聲便馬上答應，且分文不收。

葉準老前輩，十分旺場，這邊廂為阿棠的電影拍一日戯咁大把，還大展其黐手功夫，那邊廂，約廿多日前，剛與導演王家衛簽了約，以六萬元顧問費為其一部新片擔任顧問。

葉準師傅透露，其實今次撮成他與王家衛合作，純因徒弟黎應就「搭路」，據他所知，此片還有林嶺東、張同祖等參與籌備，執導此片的會是王家衛。

問到葉準師傅可知王家衛簽他任顧問，是否打算拍關於李小龍的電影? 他稱也曾問過導演，當其時導演告訴他想拍有關其先父葉問來港之後的事蹟，但他認為其父來港後，生活十分平淡，沒甚麽好拍，相反拍他的父親當年如何栽培李小龍成長還更吸引；不過，此片何時開拍，導演最後意願如何則不知曉了。他只知道自己所收的六萬元顧問費已用光。

此外，阿棠為了拍「某日某」一片，竟由預算幾千蚊的製作費，玩大到拍成十萬元，而且只在「會展」放映一場，但能一償其多年心願，還是認為花得其所。

葉準教功夫 唔一定着功夫鞋

葉準師傅雖然年紀老邁，今年已七十四嵗，但係為人開朗兼有個性。

講開佢收咗王家衛嗰筆六萬大元新片顧問費，錢一到手一啲都唔吝嗇，三萬蚊分俾兩個仔，另外三萬蚊留俾自己使，仲用嚟買自己心愛的波鞋。

唔好睇葉準師傅老人家一名，其實佢不知幾up-date，連家陣潮流興着Nike波鞋都知，原來佢都係Nike迷，仲知邊款可以炒高價。佢雖然係教詠春，原來一向唔着功夫鞋，只係着波鞋。

唔講唔知，葉準雖然一身好武功，但係最唔中意着唐裝衫褲：「外國啲電視台每次叫我訪問，我都唔會着唐裝，中國人唔係一定要着唐裝衫褲，梳長辮，我哋都會進步o架，所以要我着唐裝衫，我一定拒絕接受訪問。」今次佢肯着唐裝出鏡，全因要佢扮老竇(葉問)，否則無得傾。

-- 以上內容來自1997年7月8日 東方日報 --

>>錦棠作品 - 1959某日某<<