《一九五九某日某》歐錦棠揭李小龍底牌

一九五九年，當時他只得十八嵗，功夫唔叻尚未成名，只是愛蒲涼茶鋪崇拜貓王。

一九九六年，另一個他起初只是鬧着玩，但卻越搞越大，時間人物金錢無一幸免。埋單一計，由當初預計自資三萬銀飆升至十八萬，心痛難免，惟身兼編導演美術服裝道具雜工搵景……的歐錦棠，仍然無悔。

「我拍呢齣實驗電影《一九五九某日某》，係想講番仲係做緊死飛仔嘅李小龍，因為打傷人(呢件事千真萬確)被迫提早離開香港逃避到西雅圖前，最後一日所做嘅嘢。雖然龍哥係我偶像，但係我唔會一味讚揚佢，我會用持平嘅態度去拍。」

越搞越大劑

96年8月開始籌拍《一》片的阿棠，起初只是一心去參加由市政局及藝術發展局合辦的「自主錄像比賽」，以Hi-8攝錄機攝製一齣約15分鐘，名《o靚仔李小龍》的實驗電影。

「後來件事揚開咗，電台又訪問過我，跟住李小龍會(當時阿棠尚未是該會的顧問)聽過我個idea後，覺得好得意，叫我發大嚟搞，於是個古仔延長至半個鐘。但當我寫完第一份手稿時，大劑喇，又拉長多三個字，改用拍電視嗰啲大機betacam拍，個quaity會好好多，咁最後搞搞吓變咗一個鐘。」

整齣戲均會以「細鳳」(李小龍的乳名)稱呼。「李小龍去西雅圖前仲係死飛仔一名，女朋友多籮籮，我搵咗張文慈飾演其中一個，重同佢有場只係用紅燈打落去，見到少少背脊嘅床上戯添。」

阿棠呢招「凌空雙飛腿」犀利處在於伸完對方右腳再伸多左邊一腳，死未!

「我最開心係搵到李小龍嘅師傅葉問個大仔葉準(即李小龍師兄)飾演龍哥師傅一角，仲喺李小龍離開香港前，以茶杯比喻人生，啓發他邁向成功之路。」

「喺李小龍啱啱拍緊《精武門》仲未算好紅嗰時，加拿大記者Pierre Burton係第一個訪問佢嘅外國人，所以我特登喺片尾加上去。最特別嘅係上映時，我個樣會用電腦Key番龍哥個頭上去，嘥咗好多時間整o架，你哋《便利》係唯一見到我『真面目』嘅人。」

據阿棠透露，雖然只公映一日，且將當日所有收益捐予「奧比斯眼科飛行醫院」作慈善用途，但向來諗頭多多的他，卻同場安排了神秘節目。

「首映嗰日，現場會有李小龍嘅公仔限量發售，售價$150，而且佢個動作會好特別。乜嘢? 咪打木人樁囉，因為少見吖嘛!」