歐錦棠一腳踢 自製李小龍
撰文：葉倩文 攝影：吳永泰 陳亦龍
一人有一個夢想，歐錦棠的夢想終於實現咗嘞! 佢自編自導自演自資十八萬的實驗電影《1959某日某》卒之大功告成，故事係講佢偶像李小龍在一九五九年離港留學前廿四小時發生嘅事，究竟發生乜嘢事? 馬上倒數十九八……
一晚三個look
要扮李小龍認真唔易! 電影煞科當晚，雖然只係拍短短幾分鐘片段，但要轉三個造型，已經搞足一晚。歐錦棠這身唐裝凌空踢腿，是《精武門》的一幕經典鏡頭。
我變，變成《死亡遊戲》的李小龍扮相，一邊叫一邊耍雙節棍，阿棠頭戴的假髮，是老婆在廟街用二百五十元買回來再修剪而成，認真平靚正!
學偶像講嘢，表情又真係學到十足，身穿的白恤衫係「李小龍會」幹事吳玉福的私人珍藏，真係李小龍著過o架!
武者舞姿
除咗有武功，其實李小龍舞功亦好了得，片中唯一一位無綫外援《城市追擊》主持林文森，飾演梁醒波女兒文蘭，與「細鳳」阿棠大跳cha cha，一於「跳跳舞又動動武」。
一腳踏幾船
歐錦棠話李小龍少年時叫「細鳳」，鍾意蒲涼茶鋪又鍾意跳舞，因此結下不少情緣，卻又因年少不羈，以致每段情皆不長久，都幾花弗o架!
一夜之女
戯中張文慈與阿棠同是「蒲友」，一見鍾情下發生一夜情。阿棠：「成套戯最激呢場，我同佢一嚟就上床除衫冚被kiss，差唔多十五秒。」
黐身之女
黎思嘉飾演的富家女對「細鳳」歐錦棠最痴心兼黐身，二人會暗場交代「搞掂咗」。
臨別之女
「細鳳」臨別香江前在碼頭上一樣有艷遇，可惜他心情沉重冇理呢位靚女(黃璦瑤飾)。
超支六十倍
一句興之所至，歐錦棠原先計劃四日完成部戲，結果加場數拍了大半年；原先計劃片長十五分鐘，結果加長變成個半鐘；原先預算三千元搞掂，後來加碼至三萬十萬……最後埋單十八萬，雖然超支六十倍，但夢想成真，阿棠仍然笑呵呵!
支出項目 費用(港元)
服裝 約$3500
道具 約$1500
器材(租攝影機和燈光器材、買錄影帶等) 約$25000
拍戲場租加道具搬運費 約$30000
膳食茶水 約$10000
交通(租兩架客貨車) 約$20000
後期製作(剪接、造特別效果、配音等) 約$70000
公映場租加器材租金 約$20000
埋單約$180000
註：台前幕後工作人員友情義助，不收分文；亞視免費借出廠景和部分服裝，亦省回一筆支出。