《1959某日某》

來自 PChome 個人新聞台 - 下世紀再嬉戲　作者：KKL

「在這一生中，你還有多少次可以柔情望月當頭? 或許多至二十次也說不定。總之，一日未走完人生路，一日錯信路漫長。」——李小龍父子之墓誌銘

歐錦棠將於今年年尾與我的最愛羅敏莊合演音樂舞台劇《細鳳》，改編自歐錦棠的獨立電影《1959某日某》，又是李小龍傳之類，歌舞功夫少不了。期待之餘，問了網友一個問題：「有冇人聽過或者睇過《1959某日某》? 」十個有十個都話未聽過，難怪當年票房仆到直，蝕到佢「七個一皮」。

歐錦棠係李小龍瘋狂fans就係人都知，但佢拍過《1959某日某》就冇乜人知。1999年，歐錦棠自主錄像，自資、自編、自導、自演了一齣54分鐘的李小龍電影——《1959某日某》，除了可一嘗編導滋味外，最大原動力相信還是他對Bruce的一片忠心。雖然是滄海遺珠，但獲得頗佳評論，石琪更大讚此片可與陳果的《去年煙花特別多》相比!

故事的主角細鳳與所有50年代的飛仔青年一樣，媾女、跳舞、打交。1959年某日，他將要赴美，有情有義的他向師兄弟、女友、師夫、街頭花生妹道別，影片所記的正是細鳳在港的最後一天。咁李小龍呢? 死蠢，細鳳咪就係李小龍個乳名囉!

歐錦棠的演技令人眼前一亮，可能是偶像的關係吧，故演得特別落力；導技更令人驚喜，茶餐廳一幕有些王家衛的影子，突然回憶教小伙計出拳非常出色。歐錦棠與師傅道別一場拍得極有味道，沒有甚麼大喜大悲，對話也不多，但師徒之情盡現，顯示出中國文化的含蓄之美。歐生是李小龍瘋狂fans，少不了模仿偶像諗對白：「Martial Art just like water...When it goes to a cup, it becomes a cup. When it goes to a bottle, it becomes a bottle.」一過心癮。此片雖是低成本手作仔，但仍有超水準的表現，可是要觀眾俾錢入場的吸引力卻不足。有人會俾錢睇亞記演員嗎? 打死我都唔信。

全片來個亞記演員大集合，有杜汶澤、李潤祺、黎思嘉、張文慈、秦啟維等，此外，還有李小龍師夫葉問的兒子葉準、電影界鬼佬方保羅，剪接則是前陣子介紹的亨利潘(潘家富)。以上提及的人物中，以杜汶澤最為搶鏡，演爛仔格師兄維妙維肖，完全合乎他的性格，賤格對白包括「你教鬼佬詠春，咁佢走嚟強姦你闔家點算?」、「外國D水會洗到人攣毛o架，不如我寄水俾你啦! 」。

一個fans能花兩年時間、無數人力物力、心機精神、大灑金錢，拍一齣向偶像致敬的影片，這熱誠絕對值得表揚。大家買隻vcd支持一下啦。